काठमाडौं । चौतर्फी विरोध बढेपछि औषधि आयातको जिम्मेवारी पाएको नेपाली सेनाले स्वास्थ्य सामग्री खरिदका लागि २ अर्ब २५ करोड बढीको सम्झौता गरेको छ। चीनबाट पर्सनल प्रोटेक्टिभ इक्युपमेन्ट (पीपीई), एन ९५ मास्क लगायतका स्वास्थ्य सामग्री ल्याउन सो सम्झौता गरेको हो। नेपाली सेनाका प्रवक्ता विज्ञानदेव पाण्डेले १ करोड ८४ लाख ४१ हजार ७०६.३५ अमेरिकी डलर अर्थात २ अर्ब २५ करोड बढीको सम्झौता भएको जानकारी गराए। करिब ३ सय ४० टन स्वास्थ्य सामाग्री हवाई र स्थलमार्गबाट ल्याइने उनको भनाई छ। यसअघि ओम्नी ग्रुपसंगको सम्झौता खारेज गर्दै सरकारले १६ चैतमा स्वास्थ्य सामग्री खरिदको जिम्मा नेपाली सेनालाई दिएको थियो।