काठमाडौं । आईसीसी टी–२० विश्वकप २०२४ को आफ्नो पहिलो खेलमा नेपाल नेदरल्याण्ड्ससँग पराजित भएको छ। अमेरिकाको डालास, टेक्सासस्थित ग्राण्ड प्रिएरी क्रिकेट रंगशालामा भएको खेलमा नेदरल्याण्ड्ससँग नेपाल ६ विकेटले पराजित भएको हो। टस हारेर पहिले ब्याटिङ्गको निम्तो पाएको नेपाल अन्तिम ४ बल बाँकी हुँदा नै १०६ रन बनाइ अलआउट भएको थियो। नेपालका लागि कप्तान रोहित पौडेलले सर्वाधिक ३५ रन बनाएका थिए। उनले ३७ बलमा ५ चौका सहित सो रन बनाएका हुन्। त्यस्तै, करण केसीले १२ बलमा २ छक्काको मद्दतले १७ रन बनाए भने गुल्सन झाले १५ बलमा १ छक्का सहित १४ जोडेका थिए। नेपाललाई अलआउट गर्न बलिङमा नेदरल्याण्ड्सका लागि टिम प्रिन्जल र लोगन भान विकले ३–३ विकेछ लिएका थिए भने पउल भान मिकेरन र बास डे लिडले समान २ विकेट लिए। १०७ रनको लक्ष्यसहित ब्याटिङ्गमा उत्रिएको नेदरल्याण्ड्सले १८।४ ओभरमा केबल ४ विकेटको क्षतिमा सो लक्ष्य प्राप्त गर्यो। नेदरल्याण्ड्सका लागि ओपनिङ ब्याटर म्याक्स ओडाउडले अर्धशतक प्रहार गरे। उनले ४८ बलमा ४ चौका र १ छक्का सहित ५४ रन बनाइ नटआउट रहे।