लण्डन । विश्वका सबैजसो मुलुकमा आतंक मच्चाइरहेको कोरोना भाइरसले बेलायतमा एकै दिनमा ५ सय ६३ जनाको ज्यान लिएको छ । २४ घण्टाको अवधिभित्र बेलायतमा कोरोनाबाट मृत्यु हुनेको संख्या यो नै अहिले सम्मकै सबै भन्दा बढी हो । बुधबार दिउँसो जारी गरिएको तथ्यांकअनुसार कोरोनाबाट बेलायतमा ज्यान गुमाउनेको कुल संख्या २ हजार ३ सय ५२ पुगेको छ ।
स्वास्थ्य विभागले दिएको जानकारी अनुसार दैनिक ४ हजार ३ सय २४ का दरले कोरोना संक्रमणका रोगीहरु बढ्ने गरेका छन् । बेलायतमा हालसम्म २९ हजार ४ सय ७४ जनामा कोरोना भाइरस पोजिटिभ देखिएको छ । कोरोनाको संक्रमण शुरु भए यता करिब २ हजार स्वास्थ्यकर्मीको कोरोना भाइरस परिक्षण गरिएको प्रधानमन्त्रीको कार्यालयले जनाएको छ । कोरोनाको कारणबाट विश्वमा ४५ हजारभन्दा बढीले ज्यान गुमाइसकेका छन् ।