एजेन्सी । लकडाउन उल्लंघन गर्ने नेपालीमाथि प्रहरीले गरेको लाठीचार्जको सामाजिक सञ्जालमा विरोध भइरहेको बेला फिलिपिन्सका राष्ट्रपति रोड्रिगो डुटर्टेले पुलिस र सेनालाई लुजोनको टापुमा लागू गरिएको एक महिना लामो लकडाउनका बेला समस्या निम्त्याउने जो कोहीलाई पनि गोली हान्न आदेश दिएको सुन्दा के भन्लान् ? बिना काम सडकमा लखर लखर हिंड्नेमाथि प्रहरी प्रशासनले कडाई गर्नु अनौठो होइन । तर यही विषयलाई सामाजिक सञ्जालले अतिरञ्जित बनाइरहेको बेला फिलिपिन्सका राष्ट्रपतिको यति कडा निर्देशन आएको हो ।
मेरो आदेश प्रहरी र सेनाका अधिकारीलाई हो । यदि कसैले झगडा गर्छ र तपाईंको ज्यानलाई खतरा हुने स्थिती निम्त्याउँछ भने उनीहरुलाई गोली ठोक्नुहोस्, उनले बुधबार अबेर प्रसारित टेलिभिजन सम्बोधनमा आदेश दिए । सरकारसँग खाद्य सहायताको माग गर्दै प्रर्दशन गर्ने मनिलाको क्युजन सिटीका २१ प्रदर्शनकारीलाई पक्राउ गरेपछि डुटर्टोले यस्तो आदेश जारी गरेका हुन् ।
स्यान्टिटाउनका बासिन्दाले दुई हप्ता अघिदेखि लागू गरिएको लकडाउनका बीच आफूहरुले सरकारबाट अन्य राहत सामग्रीका साथै खाद्य सहयता नपाएको गुनासो गरेका छन् । पक्राउ गरिएकामध्ये ६ महिला पनि छन् । प्रहरी अधिकारी जनरल रोनी मोन्तेजोले लाखौं जनतालाई घरभित्रै क्वारेन्टिनमा बस्न भनिएको छ । यो नयाँ नियम तोड्नेविरुद्ध आपराधिक मुद्दा दर्ता गरिने उनले जानकारी दिए ।
