काठमाडौं । विभिन्न उतारचढाव पार गर्दै एनसीसी बैंकले २५ औं वर्षमा प्रवेश गरेको छ । वाषिर्कोत्सवको उपलक्ष्यमा ४ नयाँ खाता संचालनमा ल्याएको छ । बैंकले एनसीसी सिल्भर सेभिङ्ग खाता, एनसीसी सुगम सिल्भर मुद्धती खाता, एनसीसी सिल्भर रेमिट सेभिङ्ग खाता र एनसीसी सिल्भर रेमिट मुद्धती खाता जस्ता आकर्षक निक्षेप खाताहरु संचालनमा ल्याएको छ ।
यसका साथै बैंकले बिहीबारका दिन प्रदेश १ र २ मा रक्तदान कार्यक्रम आयोजना गरी रगत संकलन गर्ने कार्य सम्पन्न गरेको छ । बैंकले प्रदेश १ को बिराटनगर, प्रदेश २ को जनकपुर र लाहान, बागमति प्रदेशको काठमाडौं मुख्य शाखा र नारायणगढ, गण्डकी प्रदेशको पोखरा, लुम्बिनी प्रदेशको सिद्धार्थनगर, कर्णाली प्रदेशको विरेन्द्रनगर र सुदूरपश्चिम प्रदेशको धनगढी गरी ९ वटा शाखाहरुबाट रक्तदान कार्यक्रम आयोजना गरी रगत संकलन गर्ने कार्य सम्पन्न गरेको हो ।
उक्त रक्तदान कार्यक्रममा विभिन्न रक्तदाताहरुबाट ५७१ पोइन्ट रगत संकलन भएको बैंकले जनाएको छ । यस्तै उक्त अवसरमा हालसम्म १६८ पटक रक्तदान गर्नु भएका काठमाडौं, बागबजार निवासी प्रेम सागर कर्मचार्यलाई बैंकका प्रमुख कार्यकारी अधिकृत रमेशराज अर्यालले सम्मान गर्दै कदर प्रत्र प्रदान गरेका थिए । देशैभर शाखा सञ्जाल फैलिएको एनसीसी बैंकले ७ वटै प्रदेशमा गरी १३७ शाखा १० वटा एक्स्टेन्सन काउन्टर र ११४ वटा एटिएम वुथहरु सञ्चालन गरीे ग्राहकलाई स्तरीय सेवा प्रदान गर्दै आएको छ । एनसीसी बैंक २५ वर्ष बैकिङ सेवा प्रवाह गर्नुका साथै सामाजिक कार्यहरुमा पनि सक्रीय रुपमा सहभागी हुदै आएको छ ।