काठमाडौँ । शेयर बजारमा सर्वसाधारणको आकर्षण बढेको बेला ग्रीनलाइफ हाइड्रोपावर कम्पनी लिमिटेडले माघको तेस्रो सातादेखि साधारण शेयर (आइपिओ) निष्काशन तथा विक्री खुला गर्ने भएको छ । ग्रीन लाइफ हाइड्रो पावरको शेयर रजिष्ट्रारमा सानिमा क्यापिटललाई नियुक्त गरेको छ । सो सम्बन्धी सम्झौतामा हाइड्रोपावरको तर्फबाट अध्यक्ष श्रीमती याङचेन डोमा लामा र क्यापिटलको तर्फबाट प्रमुख कार्यकारी अधिकृत भिष्मराज चालिसेले हस्ताक्षर गरेका हुन् । सम्झौतापछि अब कम्पनीका शेयरधनीहरुको धितोपत्र कारोबार सम्बन्धी अभिलेख राख्ने, शेयर दाखिल खारेज गर्ने, नाम सारी गर्ने लगायतका शेयरधनीहरुको लगत अद्यावधिक राख्ने सम्बन्धी सम्पूर्ण काम कारबाही सानिमा क्यापिटलले गर्ने भएको छ ।
कम्पनीले आफ्नो जारी पूँजी एक अर्ब ८० करोड रूपैयाँको १० प्रतिशत अर्थात १८ करोड रूपैयाँ बराबरको प्रतिकित्ता १०० रुपैयाँ अंकित दरको १८ लाख कित्ता शेयरहरू तथा स्थानीय बासिन्दाको लागि बिक्री खुल्ला गरिएको शेयरहरूमध्ये बिक्री नभएका १६ लाख ९६ हजार ४ सय कित्ता शेयर गरी जम्मा ३४ लाख ९६ हजार ४ सय कित्ता साधारण शेयर (सामुहिक लगानी कोष, कर्मचारी तथा सर्वसाधारणको लागि समेत गरि) निष्काशन गर्न धितोपत्र बोर्डले अनुमति प्रदान गरिसकेको छ ।