एजेन्सी । आफ्ना सन्तानका लागि आमाले के मात्रै गर्दिनन् । आफू नखाएर पनि आफ्ना सन्तानको पेट भर्ने संसारमा कोही छ भने आमा मात्रै हो । आफ्नी ४ वर्षकी छोरी र २ वर्षका छोरालाई कुकुरको मासु खुवाउने आमा पक्राउ परेकी छिन् । बालबालिकाहरु कुपोषणको शिकार भएको र आमाले उनीहरुलाई कुकुरको मासु खुवाएको सूचना पाएपछि पुगेको पुलिसले उनीहरुको उद्धार गरेको हो । पुलिसले बालबालिकाको उद्धार गरी सुरक्षित राखेको छ र आमालाई हिरासतमा लिएको छ । घटना युक्रेनको हो ।
डेलीमेलको रिपोर्टअनुसार ती महिलाले गल्लीमा घुम्ने भुस्याहा कुकुर मारेर छोराछोरीलाई त्यही कुकुरको मासु खुवाउँथिन् । उनको घरको हालत पनि निकै खराब थियो । घर निकै फोहर थियो । घरमा भित्ताबाट साङलाहरु खस्थे । युक्रेनको उत्तर पूर्वी क्षेत्रमा रहेको खारकिव शहरमा आफ्ना २ छोराछोरी र आमासँग बस्ने लिलिया ग्रेनेन्कोलाई पक्राउ गरिएको हो ।

रिपोर्टका अनुसार यी महिलाले घरका वर्षौंदेखि फोहर जम्मा गरेर राखेकी थिइन् । वर्षौंदेखि राखिएको फोहरका कारण यो घरमा साङला र मुसाको संख्या अत्याधिक भएको थियो । यी महिलाको आर्थिक स्थिति पनि निकै खराब भएको बताइएको छ । समयमा पैसा नतिरेका कारण उनको फ्ल्याटमा पानीको आपूर्ति पहिले नै बन्द गरिसकिएको थियो । फ्ल्याटको शौचालय पनि अत्यन्तै फोहर थियो । लिलियाले छोराछोरीलाई बाहिर जान पनि दिँदैनथिन् ।

पुलिसले उद्धारपछि उनका छोराछोरीलाई अस्पताल पठाएको थियो ताकि अत्यन्तै फोहर ठाउँमा बसिरहेका यी बालबालिकाको स्वास्थ्यको जाँच हुन सकोस् । यी महिलाका एक छिमेकीले पुलिसलाई सूचना दिएका थिए । उनको घरमा पुग्दा त्यहाँ छरिएको फोहर देखेर पुलिस पनि चकित परेका थिए । लिलियाका कूल ५ सन्तान छन् । तीमध्ये ३ सन्तानको संरक्षकत्व उनले गुमाइसकेकी छिन् । लिलिया दोषी ठहरिए उनलाई ५ वर्ष जेल सजाय हुन सक्छ ।