काठमाण्डौ । मेगा बैंक नेपाल लिमिटेडले चालु आर्थिक वर्षको तेस्रो त्रैमाससम्म झन्डै २ अर्ब रुपैयाँ नाफा आर्जन गरेको छ । बैंकले सार्वजनिक गरेको वित्तीय विवरणअनुसार बैंकको समीक्षा अवधिसम्म गत वर्षको तुलनामा ३५.९५ प्रतिशतले नाफा बढाउँदै १ अर्ब ९७ करोड रुपैयाँ आर्जन गर्न सफल भएको हो।
गत वर्ष यही अवधिसम्म बैंकले १ अर्ब ४५ करोड रुपैयाँ खुद नाफा आर्जन गरेको थियो। तेस्रो त्रैमाससम्म बैंकको वितरणयोग्य मुनाफा भने १ अर्ब २९ करोड रुपैयाँ रहेको छ। बैंकको सञ्चालन मुनाफा २ अर्ब ७७ करोड रुपैयाँ रहेको छ। जुन गत वर्षको यही अवधिसम्मको तुलनामा ३३.३४ प्रतिशतले बढी हो। गत वर्ष यस्तो मुनाफा २ अर्ब ७ करोड रुपैयाँ रहेको थियो। समीक्षा अवधिसम्म बैंकको खुद ब्याज आम्दानी २८.४२ प्रतिशतले बढेर ४ अर्ब ८ करोड रुपैयाँमा पुगेको छ।
गत वर्ष यही अवधिसम्म यस्तो आम्दानी ३ अर्ब १८ करोड रुपैयाँ रहेको थियो। यो अवधिमा बैंकले १ खर्ब ३३ अर्ब रुपैयाँ निक्षेप संकलन गरी १ खर्ब ३३ अर्ब रुपैयाँ नै कर्जा लगानी गरेको छ। गत वर्ष यही अवधिसम्म बैंकले १ खर्ब २७ अर्ब रुपैयाँ निक्षेप संकलन गरी १ खर्ब १० अर्ब रुपैयाँ कर्जा लगानी गरेको थियो। बैंकको रिजर्भको आकार १.६८ प्रतिशतले बढेर २ अर्ब ९७ करोड रुपैयाँको उचाइमा पुगेको छ। गत वर्ष यही अवधिसम्म रिजर्भमा २ अर्ब ९२ करोड रुपैयाँ रहेको थियो। बैंकले खराब कर्जा दर १.३१ प्रतिशत रहेको छ। आधार दर ७.५९ प्रतिशतमा सीमित छ।
