काठमाडौं । राष्ट्रिय बीमा कम्पनीको प्रमुख कार्यकारी अधिकृत पदका लागि ११ जनाले आवेदन दिएका छन् । सरकारले नियुक्त गरेका प्रमुख कार्यकारी अधिकृत डा. डिल्ली राज अर्याललाई नेपाल सरकारले गत भदौमै फिर्ता बोलाएपछि सो पद खाली भएको थियो । अर्याललाई साढे दुई वर्ष अगाडि मन्त्रालयले कम्पनीको प्रमुख कार्यकारी अधिकृतमा नियुक्त गरेको थियो । कम्पनीको प्रमुख कार्यकारी अधिकृतका लागि आवेदन दिनेहरुमा रमेश लम्साल, मनोज सिंह भण्डारी, सुकल्याण पराजुली, सुरेन्द्र थापा, बुद्धकाजी श्रेष्ठ, शेरजंग कार्की, तोयराज अधिकारी, कृष्णबहादुर कार्की, शेखर बराल, रामबहादुर खड्का र बरिस्मा साउद आचार्य रहेका छन् ।

कम्पनीको प्रमुख कार्यकारी अधिकृत पदको पदपुर्ति सिफारिस उपसमितिले मंसिर १२ गते १५ दिनको समय दिएर आवेदन खुला गरेको थियो । कम्पनीले खुला प्रतिस्पर्धाबाट पदपुर्ती गर्न लागेको हो । बीमा, व्यवस्थापन, वित्त, लेखा, अर्थशास्त्र, बाणिज्य शास्त्र, कानुन, गणित, तथ्याङ्क शास्त्र वा इन्जिनियरिङ विषयमा कम्तिमा स्नातकोत्तर वा सो सरहको उपाधि हासिल गरी कम्पनीमा व्यवस्थापक तहमा बीमा क्षेत्रमा भए कम्तिमा ५ वर्ष वा आर्थिक, बैंक वित्तीय क्षेत्रमा भए ८ वर्ष तथा दुबै क्षेत्रमा भएर बीमामा एक वर्षको अनुभव सहित कम्तिमा ७ वर्षको अनुभव भएका व्यक्तिले आवेदन दिन पाउने व्यवस्था रहेको थियो ।