काठमाडौं । अहिले कोरोना संक्रमणले विश्व नै संकटमा फसेको छ । हजारौं मानिसको ज्यान गइसकेको र लाखौं प्रभावित बनेको कोरोना रोकथामका लागि सरकारले थुप्रै निर्णयहरु गरे पनि कार्यान्वय पक्ष फितलो देखिएको छ । सरकारले कोरोना भाइरस संक्रमितको उपचारमा संलग्न स्वास्थ्यकर्मीलाई विशेष प्याकेज घोषणा गरेको छ । नोभल कोरोना भाइरस रोकथाम तथा नियन्त्रण उच्च स्तरीय समन्वय समितिको बैठकले यस्तो निर्णय गरेको हो । कोरोना भाइरसबाट संक्रमित जनताको उपचारमा संलग्न डाक्टर, नर्सलाई ७५ प्रतिशत थप भत्ता दिनुका साथै १० लाख रुपैयाँको बीमा सुविधा समेत प्रदान गर्ने निर्णय गरेको छ । भारतमा कोरोना रोगको उपचार गर्न छाडेर झण्डै ७ सय चिकित्सक भागेको समाचार बाहिर आएको भोलिपल्ट सरकारले यस्तो निर्णय गरेको हो । त्यस्तै, अन्य स्वास्थ्यकर्मीलाई ५० प्रतिशत भत्ता दिने निर्णय गरेको छ । कोरोनाको उपचारमाअप्रत्यक्ष रुपमा संलग्न अन्य जनशक्तिलाई २५ प्रतिशत भत्ता दिने निर्णय गरेको बैठकपछि जानकारी दिइयो । बैठकले काठमाडौंमा २२० वटा आईसियु तयार गर्ने निर्णय समेत गरेको छ । जस अनुसार टेकु अस्पतालमा २०, सशस्त्र प्रहरी अस्पतालमा २०, आयुर्वेद्ध अस्पताल कीर्तिपुरमा २०, वीर अस्पतालमा २०, सैनिक अस्पतालमा २० र पाटन अस्पतालमा २० गरी २ सय २० वटा आइसीयु बेड तयार गरिनेछ ।