काठमाडौं । सबैलाई छिटै धनी हुने भूतले सताएको छ । अपराध जहाँ पनि हुन थालेको छ । मान्छेको स्वास्थ्यसँग खेलेर पैसा कमाउन खोज्ने अपराधीलाई के सजायाँ दिँदा ठिक होला ? अहिले बजारमा नक्कली सेनिटाइजरको बिगबिगी बढेको छ । अहिले बजारमा केही सेनिटाइजरमा इथानोल राख्नुको सट्टा हानिकारक मिथाइल मिसाइएको पाइएको छ । यस्तो अपराध बढेपछि प्रहरीले यस्तो सामान बरामद गर्दै नक्कली सामान उत्पादन गर्ने व्यक्तिहरुलाई पनि पक्राउ गर्न थालेको हो । कोरोना भाइरसको संक्रमणबाट जोगिन भन्दै ह्याण्ड–वासले हात धुनु र सेनिटाइजर प्रयोग अनिवार्य जस्तै भएको मौका छोपी अपराधिक मानसिकताका केही व्यापारीले यस्तो अपराधिक धन्दा अघि बढाएका हुन् ।
विश्वमै चलेका ब्रान्डहरुको स्टिकर समेत आफैंले छपाई गरी उनीहरुले खाली बोत्तलहरुमा लेभलिङ तथा महङ्गो मुल्य राखी दुरुस्त सक्कली ब्रान्ड जस्तै बनाई बजारमा बिक्री वितरण गरेको अनुसन्धानबाट खुलेको छ । बरामद भएको नक्कली सेनिटाइजर हातमा लगाउना साथ चिलाउने र रातो हुने गरेको बताइएको छ ।