काठमाडौं । समाजमा महिला हिंसा र अपराधका घटना डरलाग्दो गरी बढेको छ । दिननिदनै जसो बलात्कार, हत्या जस्ता घटना भइरहेको बेला काठमाडौ उपत्यकाको कपनमा १४ वर्षीया किशोरी र माकलबारीमा अन्दाजी ३० वर्षीया युवतीमाथि बलात्कार भएको छ । प्रहरीका अनुसार यी दुवै घटना गएराति भएका हुन् । १४ वर्षीया किशोरीलाई ललाईफकाई बलात्कार गरेको आरोपमा भैरहवा घर भई कपन बस्ने ४० वर्षीय देशबहादुर गुरुङलाई प्रहरीले पक्राउ गरेको छ । गुरुङले ती किशोरीलाई प्रलोभनमा पारेर बलात्कार गरेको अनुसन्धानको क्रममा खुलेको प्रहरीको भनाइ छ । ती किशोरीले आइतबार बिहान बौद्ध प्रहरीमा जाहेरी दिएपछि गुरुङ पक्राउ परेका हुन् । यस्तै माकलबारी घटनामा पनि प्रहरीले दुई जनालाई पक्राउ गरेको छ । प्रहरीका अनुसार सिन्धुपाल्चोक घर भएका भुवन बिष्ट र दोलखा घर भएका पासाङ शेर्पा पक्राउ परेका हुन् । गएराति युवतीसँगै उनीहरुले रक्सी खाएका थिए । रक्सीले आफूलाई झ्याप बनाएपछि उनीहरुले बलात्कार गरेको ती पीडित युवतीले प्रहरीसमक्ष बयान दिएकी छन् । पक्राउ परेका तीनै जनामाथि थप अनुसन्धान भइरहेको प्रहरीले जनाएको छ । प्रहरीको तथ्यांकलाई हेर्ने हो भने लकडाउनको समयमा नेपालमा बलात्कारको ग्राफ बढ्दो छ । बलात्कार मात्र नभएर चोरी, हत्या र आत्महत्या जस्ता घटनाहरु पनि बढेको महानगरीय प्रहरी परिसर काठमाडौँका एसएसपी श्यामलाल ज्ञवाली बताउँछन् । चैत ११ देखि जेठ १० गतेसम्ममा बलात्कारका ३ सयभन्दा बढी मुद्धा दर्ता भएको नेपाल प्रहरीका प्रवक्ता निरज शाहीले बताए ।