काठमाडौं । कोरोना महामारीको सामना गरिरहेका बेला प्रकृतिले अर्को प्रहार गरेको छ । कोरोनाले ज्यान बचाउन गाह्रो परिरहेको बेला विनाशकारी सलहर अब बीउ पनि जोगाउनु पर्ने अवस्थाको सिर्जना गर्दैछ । ठूलो समूहमा हिड्ने, लामो दूरीसम्म उड्न सक्ने विनाशकारी कीरा सलह नेपाल प्रवेश गरिसकेको छ । नेपालका बारा, पर्सा, रुपन्देही, सर्लाही लगायतका जिल्लामा शनिबार बिहानदेखि सलह देखिएको कृषि तथा पशुपन्छी मन्त्रालयले जानकारी दिएका छ । बाराको निजगढ, डुमरवाना क्षेत्रमा सलह देखिएको प्रमुख जिल्ला अधिकारी रुद्रप्रसाद पण्डित जानकारी दिनुभयो ।प्रजिअ पण्डितका अनुसार बाराका कृषि कार्यालय र स्थानीय तहसँग समन्वय गरी तस्बिर खिचेर मन्त्रालयमा पठाइएको छ । सलह कीराबारे अनुसन्धान भइरहेको मन्त्रालयका अधिकारीहरुले जनाएका छन् । फट्याङ्गा जातका यी कीराले हरियो रुखपाल तथा अन्नबालीमा बसी खाएर नष्ट पार्ने हुनाले अनिकाल तथा भोकमरी उत्पन्न हुने खतरा हुन्छ । कृषि ज्ञान केन्द्र बाराका प्रमुख जितेन्द्र यादवलगायतले बारा जिल्लामा देखिएका सलहका तस्बिर तथा भिडियो सामाजिक सञ्चालमार्फत सार्वजनिक गर्नुभएको छ।