नयाँ दिल्ली । महामारीले सबैतिर आतंक सिर्जना गरेको छ । भारतजस्तो सम्पन्न मुलुकमा समेत स्वास्थ्य सामग्रीको अभाव भइरहेको छ । जहाँ अक्सिजनकै अभावमाका कारण संक्रमितले ज्यान गुमाउनु परेको छ । भारतको मध्यप्रदेशमा आक्सिजन अभावका कारण १२ कोरोना संक्रमितको मृत्यु भएको छ । प्रदेशको शहडोल मेडिकल कलेजको सघन उपचार कक्ष (आईसीयू) मा उपचाररत ती संक्रमितको अक्सिजन आपूर्तिमा समस्या भएपछि शनिबार राति मृत्यु भएको भारतीय सञ्चारमाध्यमले जनाएका छन् । समाचारका अनुसार उपचाररत संक्रमितमा अक्सिजन अभाव हुन थालेपछि तड्पिन थालेका थिए । त्यसपछि मात्र अक्सिजन व्यवस्था गर्न अस्पताल प्रशासन हतारिएको थियो । यसअघि पनि सो अस्पतालमा १० कोरोना संक्रमितको अक्सिजन अभावकै कारण ज्यान गएको बताइएको छ । यससँगै अक्सिजन अभावकै कारण अस्पतालमा ज्यान गुमाउनेको संख्या २२ पुगेको दैनिक भास्करले जनाएको छ । पछिल्लो समय भारतमा कोरोना संक्रमण तीव्र बनेपछि अस्पतालमा बिरामीको चाप बढेको छ । यससँगै अक्सिजन, रेम्डिसिभिरलगायतका औषधीको अभाव भएको समाचार बाहिर आएका छन् ।