धादिङ । धादिङ जिल्लाको ज्वालामुखी गाउँपालिकाको वडा नम्वर ६ का ५ वटा टोललाई पुर्ण सरसफाइ युक्त टोल (स्वच्छ र सफा गाउँ) घोषणा गरिएको छ । सामाजिक विकास मन्त्रालय बागमती प्रदेशका सचिव गोकर्णमणी दुवाडीले एक समारोहकाबीच सो वडामा रहेका देउराली, हुलाकभन्ज्याङ, मिलनटोल, सेतीदेवी र साँधभन्ज्याङ टोललाइ स्वच्छ र सफा टोल घोषणा गर्नुभएको थियो ।
उक्त टोल जिल्लाकै पहिलो पूर्ण सफाई टोल बन्न पुगेको छ । सरकारको पुर्ण सरसफाइ मार्गदर्शन २०७३ अनुसार सफा र स्वच्छ टोल घोषणा हुनको लागि आवश्यक पर्ने सवै सुचकहरु पुरा गरेकाले ती ५ वटै टोललार्इ पुर्ण सरसफाइ युक्त स्वच्छ र सफा गाउँ घोषणा गरिएको ज्वालामुखी गाउँपालिकाका स्वास्थ्य संयोजक सुजन श्रेष्ठले बताए । सो मार्गदर्शनमा २०७३ ले ५ वटा चरणहरु सम्बन्धित बासिन्दाले पालना गर्नुपर्ने हुन्छ ।
तीमध्ये शौचालयको उचित प्रयोग, ब्यक्तिगत सरसफाइ, सुरक्षित खानेपानी, सुरक्षित र स्वच्छ खाना, घर तथा आँगनको सरफाइका १५ वटा सुचकहरु तथा ४५ वटा सहायक सुचकहरु पुरा गरेमा पुर्ण सरसफाइयुक्त गाउँ भन्न मिल्ने व्यवस्था छ । घोषणासभालाई सम्बोधन गर्दै सामाजिक विकास मन्त्रालयका सचिव दुवाडीले घोषणा गरिएका प्रतिबद्धतालाई व्यवहारमा कार्यान्वयन गर्न आग्रह गर्दै बागमती प्रदेशका सबै जिल्लामा यस्तो सन्देश पु¥याउन सफल भएकोमा गाउँपालिका र टोलसुधार समितिहरुलाई धन्यवाद ज्ञापन गर्नुभएको थियो । पर्यटन वर्ष २०२० को प्रवद्र्धनका लागि यस्ता किसिमका कार्यक्रमले सहयोग पुर्याउने उहाँको आशय थियो ।
ज्वालामुखी गाउँपालिकाले सुरुवात गरेको यो प्रयासले नेपाल सरकारले सन २०३० सम्ममा राखेको दिगो विकासको लक्ष्य प्राप्तीलाइ पनि टेवा पुग्ने समेत दुवाडीले कार्यक्रममा बताउनुभएको थियो । सो कार्यक्रममा ज्वालामुखी गाउँपालिकाका अध्यक्ष विनोद तिमल्सेनाले आगामी ३ वर्षभित्र सिङ्गो गाउँपालिकालाइ नै पुर्ण सरसफाइ युक्त गाउँ घोषणा गर्नको लागि काम थालिसकेको बताउँदै यस कार्यमा सबै स्थानीय बासिन्दाको साथ सहयोगको अपेक्षा गर्नुभएको थियो । स्वच्छ र सफा गाउँ घोषणा गर्नको लागि गैरसरकारी सस्थाहरु शान्ति नेपाल, एन्फो नेपाल लगायतले ज्वालामुखी गाउँपालिकासंग साझेदारी गरेर जनचेतनामुलक कार्यक्रम तथा प्राविधिक सहयोग गरेका थिए ।
