टोकियो । विश्वलाई नै आतंकित बनाएको कोरोना संक्रमण विश्वभरि फैलिइरहेको छ । ठ्याक्कै औषधि उत्पादन नभएका कारण देशैपिच्छे फरक फरक प्रयासहरु भइरहेका छन् । यही प्रयास अन्तर्गत जापानमा भने दमका विरामीलाई दिइने औषधिले कोरोना संक्रमित विरामीलाई धेरै फाइदा पुगेको बताइएको छ । जापानी चिकित्सकहरुले कोरोना भाईरसका बिरामीहरुलाई दमको औषधिबाट उपचार गर्दा स्वास्थ्यमा सुधार ल्याएको बताएका हुन् । जापानको कानागावा प्रिफेक्चरको आसिगराकामी अस्पतालका चिकित्सकहरुको टोलीले तीनजना कोरोना भाईरस संक्रमितमा गरेको उपचारमा दमको औषधि प्रभावकारी भएको बताएका छन् । जापान सरुवा रोग संघको वेवसाईटमा राखिएको नतिजा अनुसार कोरोना भाईरसबाट ग्रसित बिरामीहरुलाई दमका रोगीलाई दिईने औषधि दिएपछि स्वास्थ्य सुधार भएको उल्लेख छ । तीनजना रोगीमा रोग प्रतिरोधात्मक क्षमता बढाउन सिस्लिसोनाईड नामको दमको औषधिले प्रभावकारी काम गरेको चिकित्सकहरुले बताएका छन् ।
चिकित्सकहरुको टोलीले ६५ बर्ष उमेर माथिका तीनजना संक्रमितमा दमको औषधिले उपचार गर्दा काम गरेको र हाल उनिहरुको अवस्था खतरामुक्त रहेको छ । दमको औषधिको प्रयोगबाट दुईदिनमै बिरामीको स्वास्थ्यमा सुधार ल्याएको चिकित्सकहरुको दाबीका बिच ७३ बर्षिया महिलाले आफुले पहिलाकै अवस्थामा पाएको बताएको रिपोर्टमा उल्लेख छ । दमको औषधि प्रयोगबाट कोरोना भाईरस संक्रमितको स्वास्थ्यमा सुधार आएको विवरणका बीच जापानको राष्ट्रिय संक्रामक रोग नियन्त्रण संस्थानले यसबारे विस्तृत जानकारी संकलन गर्ने काम भईरहेको बताएको छ ।
संस्थानका चिकित्सकहरुको टोलिले दमको औषधि प्रयोगको प्रभावकारीता पुष्टि गर्न सँगै मिलेर थप संक्रमितहरुको उपचार अघि बढाउन लागेको जनाएको छ । जापानमा हालसम्म कोरोना भाईरसको संक्रमणबाट ९ सय ८६ जना संक्रमित भएका छन् भने १२ जनाले ज्यान गुमाएका छन् । ४३ जना गम्भिर अवस्थामा उपचाररत रहँदा ४३ जनाले मात्र स्वास्थ्यलाभ गरेको विवरण जापानको स्वास्थ्य मन्त्रालयले मंगलबार सार्वजनिक गरेको छ ।
