काठमाडौं । कोरोना आतंककाबीचमा भएका सबै मृत्युलाई कोरोनासँग जोड्ने गरिएको छ । तर ल्याब रिपोर्टले भने त्यस्तो देखाएको छैन । कोरोना संक्रमणको कारण चितवन र बुटललमा एक–एक जना, पाटन हस्पिटलमा एक जना र वीर हस्पिटलमा २ जना गरी पाँच जनाको मृत्यु भएको आशंका गरिएको थियो । तर यी पाँच जना मृतकको स्वाब परीक्षणमा कोरना भाइरसको संक्रमण देखिएको छैन । कोरोना आशंका गरिएका मृतक सबैको परिक्षण गर्दा नेगेटिभ रिर्पोट आएको स्वास्थ्य तथा जनसंख्या मन्त्रालयले जनाएको हो । पहिलो पटक चितवनमा कोरोना आशंका गरिएको ३० वर्षीय एक युवाको मृत्यु भएको थियो । ज्वरो र निमोनिय देखिएपछि चितवन महानगरपालिकाले स्थापना गरेको अस्थायी कोरोना हस्पिटलमा भर्ना भएका थिए । उनमा कोरोनाको संक्रमण नदेखिएको स्वास्थ्य तथा जनसंख्या मन्त्रालयले जनाएको छ ।
बुटवलमा चैत १६ गते कारोना संक्रमणको आशंका गरिएका बाबुराम थापाको मृत्यु भएको थियो । बैदेशिक रोजगारबाट उनलाई लुम्बिनी प्रदेशिक अस्पतालको आईसोलेसन वार्डमा उपचारको क्रममा मृत्यु भएको थियो । उनलाई ज्वरो, खोकी र श्वासप्रश्वासको समस्या देखिएपनि कोरोना नेगेटिभ देखिएको स्वास्थ्य तथा जनसंख्या मन्त्रालयले जनाएको छ । मन्त्रालयका अनुसार उनको टाइफाइडका कारण मृत्यु भएको हो ।
पाटन अस्पतालमा सोमबार मृत्यु भएका धादिङका युवकको कोरोना संक्रमण सम्बन्धी परीक्षणको नतिजा कोरोना संक्रमित भएको नदेखिएको हो । मंगलबार आएको रिर्पोट अनुसार उनको नतिजा नेगेटिभ आएको पाटन अस्पतालका निर्देशक विष्णु शर्माले जानकारी दिए ।
यस्तै वीर अस्पतालमा उपचारका क्रममा मृत्यु भएकी महिलामा पनि कोरोना भाइरस संक्रमण नभएको पुष्टि भएको छ । राष्ट्रिय जनस्वास्थ्य प्रयोगशाला, टेकुमा गरिएको परीक्षणमा नेगेटिभ रिपोर्ट आएको वीरका डा. विद्यानिधि पौडेलले जानकारी गराए । बीर हस्पिटलमै मृत्यु भएको अर्को एक जनाको रिर्पोट पनि नेगेटिभ देखिएको बताइएको छ ।